潮熱無有怕﹗夏天繼續散發自信魅力﹗

June 2014

「近呢年開始，我時不時都周身熱，冬天還可以，夏天最辛苦，塊面好熱好脹，好唔舒服，不過每次維持5分鐘左右又涼番，而且夜晚訓覺會流好多汗，容易紮醒，搞到心情好煩躁﹗」以上係46歲Cogia(化名)的心聲。

其實，Cogia呢個狀況稱為「潮熱」(hot flashes)，係女性在更年期最常見的徵狀之一。由於女性荷爾蒙分泌失調，即係雌激素(estrogens)水平下降，影響下丘腦(hypothalamus)體溫調節機制，錯誤感應身體好熱，為左身體散熱，繼而令到表皮血管擴張，造成潮熱和出汗。

40-60歲女性中75%有潮熱不適，程度和頻率都係因人而異。潮熱出現時，面部會發熱發紅，之後好似一陣陣的熱浪湧向頸部、心口、全身，通常每次30秒至5分鐘不等，有些人會熱到出汗、心跳加速。潮熱症狀可以一日之內出現幾次，甚至每個鐘都出現，規律好難掌握，不但令人尷尬，而且令人忟憎，無心情做家務和返工，連行街的興趣都大減﹔潮熱在夜晚睡覺時出現得比較頻密，影響睡眠質素，甚至失眠，非常之牽動情緒，容易煩躁不安。

潮熱女性當中有70%持續兩年徵狀就漸漸消失﹔有些人則持續幾個月或幾年先至消失，因人而異。雖然潮熱無得預防，不過Cogia從飲食營養和生活習慣入手之後，潮熱出現得少左，而且無之前咁唔舒服，成個人開心返晒﹗

每次潮熱開始時，先飲一杯涼水，深深吸氣、呼氣，放鬆身體，再想像自己身處一個好涼爽的地方，心靜自然涼。最最最緊要Cogia每日都有飲足夠水(6至8杯)，可幫助降溫架﹗

飲食營養

中醫角度睇，潮熱由於陰虛火旺，所以滋陰降火的食物最好喇﹗經常適量食深綠色蔬菜和清涼多汁的水果，好似西瓜、水梨、橙、蘆柑、蘋果、柿子，有豐富的維他命和礦物質，高纖維，幫助增強抵抗力，又可以減輕潮熱的程度和頻率。

除此之外，Cogia都會自己沖泡保健茶，舒緩心煩內熱﹕將枸杞、百合、金銀花放入熱開水沖泡約10-20分鐘就可以飲架啦。

夏天有潮熱已經好辛苦，如果再食熱底或熱氣食物，就會熱上加熱，令潮熱出現得更加頻密架！所以一定要戒口，好似辛辣、酒精、刺激食物、火鍋、BBQ、煎炸野、微波爐食物、補身藥、熱飲、含咖啡因飲品 (例如咖啡、奶茶)。

因為牛肉、雞肉、牛奶製品都含有生長激素，食左之後好可能會擾亂體內荷爾蒙的平衡，所以Cogia連至愛的芝士都決心唔食住，不過之後少左潮熱都係值得架﹗肉類多數揀魚肉或豬肉，又或者食大豆製食物黎攝取蛋白質，例如豆腐、豆漿、豆奶，因為大豆所含的大豆異黃酮(Soy isoflavones)係植物性雌激素，結構同女性荷爾蒙相似，可幫助平衡女性荷爾蒙，減輕潮熱問題。

如果想睡得好些，睡前4個鐘，盡量唔好食糖果、雪糕、甜品、汽水、餅乾、薯片、即食麵等精製碳水化合物，因為會令血糖時高時低，難以入睡。

生活習慣

保持屋企室內空氣流通，吹下風扇和冷氣都有幫助架﹔出街盡量行通爽或有冷氣地方，避免人多擠迫。

今個夏天流行著雪紡質料衫，有潮熱的你，可以買返幾件，平日著薄身、透氣衫，寧願著多幾件薄身好過一件厚身，因為潮熱時可隨時除掉，亦都唔好著太貼身的衫褲、leggings、絲襪之類。睡覺時，最好著棉質睡衣，以提高吸汗作用。

Cogia得閒會去暢泳、緩步跑、做下健身操。適當的運動，可以減輕潮熱的症狀，仲舒緩到壓力，不過唔好太劇烈喎﹗保持心境開朗樂觀，約會三五知己扮靚傾計，同屋企人一齊睇下電視劇，都會幫到減輕症狀架﹗

如果想知有咩營養補充品幫到手，可以睇返之前的一篇文章【女士應如何選服Vitex、Soy Isoflavone 和Black Cohosh?】﹔又如果想了解自己的情況，歡迎隨時向HealthQuest的nutritionists/health specialists或茅博士查詢。